भारत की संस्कृति के लिए... भाषा की उन्नति के लिए... साहित्य के प्रसार के लिए
कोटगेट रो भायलो / राजेन्द्र जोशी
Kavita Kosh से
बण रैयी है अेक हवेली
लांबी अर फूठरी
स्हैर री गळियां मांय
भाटा भेळै, इण हेवली नै सजावतो
कोटगेट रो भायलो।
उण रो नांव नीं जाणै
गांव नीं जाणै हवेली रो सेठ
उण नै इत्तो ईज जाणै
कोटगेट कनै ऊभो रैवै।
बो दिनूगै निगै आयो
कोटगेट री भीड़ मांय
कमती रेट, हामळ भरतो
कपड़ै री गांठड़ी मांय टिफन लियां।
पछै अेक चौकी माथै
बिना बिछावट रै
रात बितावै
अर सुपनां देख नीं सकै पूरा
पुलिस आळा डंडो बजावै
ज्यूं चकळाघर री चौकी में आवै
नींद री वसूली खातर।
