भारत की संस्कृति के लिए... भाषा की उन्नति के लिए... साहित्य के प्रसार के लिए
जमाना कईसन हए / रामविलास
Kavita Kosh से
सेन्ह पर गरज रहल हए चोर, जमाना कइसन हए ?
करइअ कहूँ न कोई सर, जमाना कइसन हए ?
जहां सुनाबे दर्द हुलसके जाइत रहलन,
उहे थाना से हए गंठजोर, जमाना कइसन हए ?
कउआ गीध चिल्होर प्रतिस्ठा के पद पर हए,
भरइअ पानी सुग्गा मोर, जमाना कइसन हए ?
लास पर कक्कर चढ़के कोन कहाँ आगू बढ़ जाए,
मचल हए इहे बात के होर, जमाना कइसन हए ?
अन्हरा के कन्हा पर लंगरा जमके बइठल,
पकरके सत्ता के हर डोर, जमाना कइसन हए ?
त्याग तपस्या प्रतिभा सब बेकार बात हए,
जमल हए कुर्सी पर मुँहजोर, जमाना कइसन हए ?
पालतू भेलाक भालू बाघ सगर जंगल खाली हए,
आदमीए हए आदमखोर, जमाना कइसन हए ?
