तिम्रा शब्द / सविता गौतम दाहाल
तिम्रा शव्दले म माथि हुकुम चलाएको निकै भएछ
तिम्रा शव्दको तालमा म नाँच्छु
लयमा रुन्छु , खुशी हुन्छु
शक्तिशाली कुनै वादशाह भन्दा कम छैन
तिम्रो शव्दको ताकत
तिम्रा शव्दले
मलाइ घंटौ पर्खाउँछ
महलको एक कुनावाट अर्को कुनासम्म
दिनभर दौडाउछ
थाक्छु
अनि फेरि तिम्रा दुइ–चार शव्दले
यसरी फुरुङ वनाउछ
सवै कुदाइ , दुखाइ
महज , व्यायाम प्रतित हुन्छ ।
इष्ट देउताको भन्दा कम छैन्
तिम्रा शव्दप्रति मेरो श्रद्धा
लाग्छ जे चाहन्छौ , त्यहि चढाँऊ
तिमीलाइ मनपर्ने फूलहरु खोजेर अर्पण गरुँ
श्रीखण्ड घोटेर चन्दन वनाऊ
जुन मन्त्र तिम्रो प्रिय छ
त्यहि मात्र गाँऊ
फलपनि तिम्रै स्वादको टिपेर ल्याँऊ
र कुनै पवित्र उपवासको सन्तुष्टि पाँऊ ।
तिम्रा शव्दमा
सूर्यको तेज देख्छु
चन्द्रमाको शीतलता महशुश हुन्छ
शिवको क्रोध
शिवकै जस्तो प्रेम
वेलावेला शिवकै जस्तो ध्यान र ज्ञान पाउँछु
तिम्रा शव्दमा म विश्व व्रम्हाण्ड वुझ्छु ।
गीताको सार पाउँछु
जीवनप्रतिको आभार
निस्सार भएको क्षण
सृष्टिको उदगार पाउछु
रुदारुदै हाँसेकी छु
हास्दाहास्दै रोएकी छु
तिम्रा शव्दसंगै गंगाजस्तै वहेकी छु
वेलावेला खहरे जस्तै धमिलिएकी छु ।
प्रभावशाली विष्णुको भन्दा कम छैन्
तिम्रा शव्दको मोहनी
कृष्णका गोपिनी जस्तै लठ्ठीएकी छु
राधाले जस्तै प्रेम गरेकी छु
मीराले जस्तै भक्ति गीत गाएकी छु
तिम्रा अवतारहरुमा सधैं जंगल जंगल हिडेकी छु ।
तिम्रा शव्दको संगीत
शव्दमा लिखीत गीत
शव्दद्धारा गरिने प्रीत प्रिय लाग्छन् ।
तिम्रा शव्दको कायल छु
यद्यपि तिम्रै शव्दले वेलावेला म घायल छु ।
मलाइ व्यूँताउने र पुर्नःजीवन
दिनेपनि तिम्रा शव्दनै हुन्
मेरो जीवनको नयाँ रंग
तिम्रै शव्दले कोर्नेछन्
म वाँचेको इतिहासपनि
तिम्रै शव्दले लेख्नेछन्
मलाइ राम्ररी थाहा छ
मलाइ ‘म’ वनाउने नै तिम्रा शव्द हुन् ।
