भारत की संस्कृति के लिए... भाषा की उन्नति के लिए... साहित्य के प्रसार के लिए
तू याद कर / हरीश हैरी
Kavita Kosh से
तू याद कर
रोई रै राह में
घणांई ऊंटगाडा चालता
भात्तो ले जांवती तू
म्हारै ऊंटगाडै नै
देख'र थम जांवती
गाडै पर बैठ्यां-बैठ्यां
आपणो प्रेम कित्तो बध्यो
आपणै प्रेम री साख भरतो ऊंट
छिन चढाय'र कितो भाजतो
बस नै ई नहीं जावण देंवतो
आप सूं आगै!
तू याद कर
घरै आंवतै बगत
हरै री पांड लियां तू
कित्ती करती म्हारी उडीक
बाकी तो
आप-आप री पांड लेय'र
उठ जांवती आप-आप रै घरै
आज भी बो ई
रोई आळो राह है
वो ई ऊंटगाडो है
पण बगत रै साथै
स्सो कीं बदळग्यो
म्हूं ऊंटगाडो लिये आऊं
म्हानै आज भी दिखै
हात रा झाला देंवती तू
आज मोड़ो कर दियो
मा रोळा करसी
इत्तो कै'र गाडै पर बैठगी तू
अ'र रोजीना री भांत म्हारै
'चल मुन्डेया' कैंवतै ई
ऊंट चाल पड़्यो
दड़ाक छंट!
