धर्म मज़हब या कारीडॉर / सिरीचन्द केसवाणी
ही
हथ सां लीकियल आहिनि
इल्म ऐं ईमान जूं
सरहदूं, प्रेम ऐं नफ़रत जूं
सरसब्ज़ गाह मथां
माक बजाइ रत जा क़तिरा
लमहनि अन्दर तन्हा तन्हा
तुंहिंजा मुंहिंजा मासूम चेहरा
ख़याबानी ज़मीन ते- कचिड़ी साई छॿरि
चबूतरा ऐं चौराहा
दरियुनि खां ॾिसी...
सन्नाटे जा सुॾिका छो बुधीं वेठो!
तो ॿिन्ही कननि ते हथ रखी
चीखूं़ फ़िज़ाउनि जूं बुधणु नथे चाहियूं
पर
मां त कन खोले बुधां वेठो।
हा, छो त मां हिरियलु जो आहियां!
परेशान न थीउ, मति जा मूढ़ियल
छो हैरत में पियो आहीं...
द्रोपदी ऐं दुशासन जी दोस्तीअ ते!!
युगु बदिलियो आहे, वेढ़ि बंद आहे
मां सदमनि जी सेजा ते
कराहे रहियो आहियां
हर सेजा गुमराह कन्दड़ आहे।
थोरो ई परियां
खू़न जो रेजु हासिल कयल ज़मीन ते
ईन्दड़ मौसम में
कहिड़े रंग ऐं बूइ वारा उसरन्दा गुल
अचरजु न खाउ त-अड़े
खि़जां जी मुन्द में हिते हीर किथां आई...
बूटा ॼारनि अन्दर इतिहास जा कारीडारं बणिया
इतमीनान त ॾिसु,
बहारुनि जा सुपना ॾिसन्दड़ जे
खू़़न में लथ-पथ इरादा-काफ़ी मज़बूत आहिनि...
राॼनीतीसियासत खां इनसानी
अधिकारनि तरफ़ सुजागु बाशिन्दा
हर वक़्ति हर तरफ़ अखियूं बंद रखी
हालतूं जाचीन्दा रहन्दा आहिनि
ऊन्दाहनि कारीडारनि मां
फहलियल हिरास कारण हरको,
भिटिकन्दड़ आत्माउनि
ऐं दहश्त खां बची हलण लाइ तावीज़ ॿधी
अञा बि सरगरदान आहिनि,
पंहिंजी सलामतीअ ख़ातिर
शंखानाद जे मनलुभाईन परलाउ
नमाज़ीअ जी पवित्रता हेठि
उलूअ जी नज़र
अजु बि, अञा बि
कुरसीअ ते विछायल आहे...
