नञ् जलाबऽ बबुआ / उमेश बहादुरपुरी
अप्पन सोना जइसन देहिया नञ् जलाबऽ बबुआ
भरल जुआनी में तों मउत नञ् बुलाबऽ बबुआ
अप्पन .....
बड़ी रे जतन से मिललो तोहरा कंचन-काया
ई देहिया पर लगऽ हो काहे नञ् तोहरा कोय माया
जिनगी के रहते तों तो नञ् अकुलाबऽ बबुआ
भरल ....
पोरे-पोरे चढ़ जइतो निकोटीन के जहरबा
उजड़ जइतो गउआँ आउ उजड़ जइतो शहरवा
दम्माँ-खाँसी से तों हाँथ नञ् मिलाबऽ बबुआ
भरल .....
मइया-बहिनी के हकय तोहरे पर असरबा
मेहररूआ रोबऽ हो घरे पकड़ के अँचरबा
तों तो हर कोय के अब असरा पुराबऽ बबुआ
भरल ....
तोहर नसवा के फेर में बिगड़ गेलो दसवा
बोलऽ हऽ तों रात-दिन बिगड़ल-बिगड़ल भसवा
तों ई देहिया के अइसे नञ् गलाबऽ बबुआ
भरल ....
बुढ़िया मइया के तों हा अँखियन के तारा
तों अइसे नञ् बुझाबऽ अपन भाग के सितारा
टी.वी. कैंसर के तों संगे नञ् सुलाबऽ बबुआ
भरल ....
बेटा आउ बेटी के भेजऽ पढ़ेले इसकुलवा
लइतो एक-दिन जीत के बेसकिमती मेडलवा
तों तो पीये ले छोड़ पइसवा बचावऽ बबुआ
भरल ....
नउका रे किरिंगिया कर रहलो हे इशारा
अब छँट गेलय अँधरिया होलय भोर-भिन्सारा
तों तो नउका रहिया चलके देखलाबऽ बबुआ
भरल .....
