भारत की संस्कृति के लिए... भाषा की उन्नति के लिए... साहित्य के प्रसार के लिए
पाडुनि बिना वण / पोपटी हीरानन्दाणी
Kavita Kosh से
मां वणु आहियां
हिकु झूर ॿुढो वणु
मुंहिंजूं पाडूं परे परे
उन ज़मीन में खुतल आहिनि
जा मूंखां खसिजी वेई आहे।
मुंहिंजियुनि जड़ुनि खे
उखोड़ण जो यतन कयो वियो हो
पर उहे जडूं, हेठि तमाम हेठि
ज़मीन खां मथे ई
मज़हब जे नाले वारी तलवार खणी,
मूंखे कटे
पंहिंजियुनि पाडुनि खां जुदा कयो वियो आहे।
हाणे मुंहिंजूं पाडूं उते आहिनि
ऐं मां कपियलु कटियलु वणु
हिते
मुंहिंजा पत्ता सुकल
टारियूं झुकियल
ऐं थुडु कुॿो ऐं चिॿो आहे।
मां पंहिंजियुनि जडुनि लाइ सिकां थो
ऐं मुंहिंजूं जडूं
मूं लाइ तड़फनि थियूं
जेसीं असीं पाण में गं/ढिजूं
(ऐं इएं थीन्दो कि अलाए न)
मां
पाणीअ में गीह जा फुड़ा विझी
उन सां पतनि खे सणिभो
ऐं थुड़ खे
नाणे जी लठि जे सहारे
सिधो करे
ताज़ो हुअण जो
ढोंगु करे
रहियो आहियां।
