भारत की संस्कृति के लिए... भाषा की उन्नति के लिए... साहित्य के प्रसार के लिए
पै‘लापै‘ल (1) / सत्यप्रकाश जोशी
Kavita Kosh से
पूंन पालकी में बैठ्या
मुरली रा झीणां सुर
म्हारा नांव नै
कूंट कूंट में गावै
कण कण रा कानां में गुंजावै,
जमना री लै‘रां म्हारां नांव नै कळकळावै,
ठेट समदर री छोळां लग पुगावै,
रूंखां रै पांनड़ां रा होठ
म्हारा नांव नै गुणगुणावै
कोयल नै सुणावै।
पण पै‘लापै‘ल
सुगणी जसोदा रा जाया !
थूं म्हारौ नांव पूछियौ ;
लजवंती लाज
म्हनैं दुलेवड़ी कर न्हाखी।
दो आखरां रौ भौळो-ढालौ नांव
म्हारै सूखतै कंठां रै
पोयण में भंवरा ज्यूं अटकग्यौ,
म्हारै होठां री लिछमण-रेखा में
बैण जांनकी दाझण लागी।
थूं म्हनैं घणी-घणी बातां पूछी,
पण सुगणी जसोदा रा जाया !
म्हारै सुरंगै गालां रै कसूंमल मै‘लां सूं
लजवंती रांणी
नीं उतरी सो नीं उतरी।
