भारत की संस्कृति के लिए... भाषा की उन्नति के लिए... साहित्य के प्रसार के लिए
भीडमा मान्छे / अभय श्रेष्ठ
Kavita Kosh से
(नपुगेको ठाउँ पुग्न त्यही बाटो हिँ ड्नुपर्छ जहाँ तिमी हुँदैनौ- टिएस इलियट)
एउटा विशाल भीडमा
म खोज्दैछु अनुहारहरू ।
अनन्त समुद्रजस्तो यो भीडमा
अनगिन्ती टाउकाहरू छन्
अनगिन्ती शरीरहरू छन्
अनगिन्ती जुत्ताहरू छन्
तर, कहीँ कतै
स्पष्ट अनुहार छैन
अनुहारका ठाउँमा
उस्तैउस्तै देखिने केबल मुखुण्डाहरू छन् ।
अनुहारहरू क्रमशः
परिणत भइरहेछन् भीडमा
तर, परिणत भइरहेको छैन भीड अनुहारमा
भीडमा त्यसैगरी सत्य पनि भइरहेछ गायब
जसरी गायब भइरहेछन् अनुहारहरू ।
यो विशाल भीडमा
म खोजिरहेछु अनुहारहरू
तर, कहीँ कतै अनुहार छैन
चुनौती दिन चाहन्छु म यो अनुहारहीन भीडलाई
उभ्याउन चाहन्छु एउटा स्पष्ट अनुहार
आफ्नै अनुहार ।
तर, खोइ कहाँ छ मेरो अनुहार –
आह ! मेरै अनुहार पनि त गायब छ यो भीडमा !
