मुलाक़ात-प्रेत आत्माउनि सां / रतन आॾिताणी
पहिरिएं साल
पंहिंजी प्रीतमा लाइ
हू माडर्न अर्जुन बणिजी
मथे फिरन्दड़ मछीअ जी अखि खे
निशानो कन्दो हो
निहारे हेठि अक्स में!
हूअ खेसि चुमियुनि सां चूसे छॾीन्दी हुई।
ॿिएं सालि
हूअ सावित्री बणिजी
पंहिंजे सत्यवान जी सिहत लाइ
जप तप कन्दी हुई
ह खेसि भाकुरनि में भरे छॾीन्दो हो।
कुछु साल पोइ
हू लही आया लफ़्जनि ते
सिर्फ़ लफ़्ज़!
डारलिंग, आइ लव यू
पंहिंजनि ॿारनि खे चवन्दा हुआ
अर्जुन ऐं सावित्री त ॾन्द कथाऊं आहिनि
हक़ीक़त थोरोई आहे?
हाणि डारलिंग जे मोट में आवाज़ ईन्दो आ,
”कुतो!“
”कुती!“
अन्धेरो हून्दो आ
तंहिं करे चवन्दड़ जो चेहरो ॾिसण में
न ईन्दो आ। वरना,
हिक ॿिए जो ख़ूनु करे छॾीनि!
हाणि त
उहे बि आवाज़ बन्द थी विया आहिनि
त बि-अलाजे कीअं संदनि कननि ते
पड़ाॾा पइजी रहिया आहिनि
”कुतो!“
”कुती!“
हाणि हिन घर में
हिकु मर्दु रहन्दो आ
हिक औरत रहन्दी आ
ॿई ज़ाल मुड़िस खे अग्नि-दाह ॾेई,
आराम सां
पंहिंजे पंहिंजे
आखि़रत जो इंतज़ारु करे रहिया आहिनि
इएं त वक़्तु सुठो पिो गुज़िरेनि
पर ज़ाल मुड़िस जी प्रेत-आत्मा
अञा मकान मां वेई कान्हे
सो कॾहिं कॾहिं परेशान थियो वञनि था।
फ़ी इलहाल, आरतवार ॾींहुं शाम जो
वेन्दउ, त मिलन्दो
चांहिं या काफ़ीअ जे प्यालनि ते
कुर्ब मां; ज़ाल-मुड़िस आहिनि
पर संभालिजो
तव्हां जिनि सां मिलिया
उहे त प्रेतआत्माऊं आहिनि
बाक़ी ज़ाल मुड़िस त कॾहोको
मरी चुका, भाई!
