भारत की संस्कृति के लिए... भाषा की उन्नति के लिए... साहित्य के प्रसार के लिए
रिस्तां री राख / हरिमोहन सारस्वत
Kavita Kosh से
आओ
राख उडावां
बुझ्योड़ै रिस्तां री
जूण री किस्तां री
ऊपणां
बै सगळी
कोझी अर माड़ी बातां
जिकी
जाणै अजाणै
बिना बकारयां
आय ऊभी हुगी
आपणै बिच्चाळै
बै बातां
आपरो काम करगी है
मूण्डां सूं नीसर’र
जींवता सगपण चरगी है
अेक भरम हो
अेक सरम ही
रिस्तां बिच्चाळै
वां दोनां
छोड़ दी है लाव
अबै धम्म सूं जा पड़ी है
तळेठी मांय
लाव सणै
रिस्तां भरयोड़ी
बाल्टी.
