वसिफ़ / हरीकान्त
वधि में वधि घाव
उन्हनि ई सठा
अठ सठा रधीन्दा रहिया जेके
अहिंसक आत्म-रक्षा जा
फ़ाइदे में हमलावर रहियो हमेशा
ॿि मुंहीं बंदूक़
ऐं ए.के-47 विच में
जंगि हालांकि
ख़तम कान थी आहे अञा
नतीजा ॾिसिजनि पिया
सुबूह शाम
रतु टिमन्दो रहियो नस नस मां
पोइ बि
असीं आरामी रहियासीं
अमड़ि शान्तीअ जे उघाड़नि गोॾनि ते
दुश्मनु कन्दो रहियो ज़ोरीअ ज़नाउ भुंइ सां
जाणनि सभेई था बिलाशक
लड़ाई, जा लडूं पिया
मासूम उत्साह सां वर्हियनि खां
हाराए चुका आहियूं कॾहो को
फ़रेब धारियनि घटि
पंहिंजनि सालारनि वधीक कया असां सां
आखि़र आहे किथे ॿियो किनारो दरियाह जो
ऐं सावा बाग़?
विच सीर में सिड़ह सरकाए पाण ॾांहुं
पहुचायो आहे असां खे जंहिं घाटि
मक्कार मीर बहरनि
बांसी
कारे पाणीअ सां वाकोड़ियलु
ॿेटु आहे वीरान
बागू ऐं बागू
वात फाड़े वेठा आहिनि किनारनि ते
वेसाहु विसामण लॻो आहें हाणि पाण मां
पंहिंजुनि पातणियुनि मां
कॾहिं पेचिरो कॾहिं पुल
कॾहिं शाह राह बणिजी
पथिरजी वियासीं धरतीअ ते
वक़्त जो रथु
रिढ़न्दो रहियो छातीअ मथां
तवारीख़ नवीस मञीनि न मञीनि
शाहिद असीं आहियूं असीं
पंहिंजे दौर जा
ॼिभ लॻल हुई जिनि जी कंहिं सबब
उतां उहे बि आहिनि अजु
सचु सलण वास्ते
तपरसु इहो आहे अलबत
अहसासु गु़लामीअ जो
उन्हनि खे
वधीक लॻो आहे बूसाटण
मल्हाईन्दा हुआ जेके
जलसा आज़ादीअ जा
सालि ब सालि
लॻे थो
ॻोल्हिणी पवन्दी
वसिफ़ आज़ादीअ जी
नएं सिर!
