भारत की संस्कृति के लिए... भाषा की उन्नति के लिए... साहित्य के प्रसार के लिए
साथीसँग / मार्गरेट स्येन / सुमन पोखरेल
Kavita Kosh से
हामीले सिर्जनात्मक मौनता कुँद्यौँ
निलम्बित मुस्कानका
समयको ओतमा ढल्किरहेका बेला
शान्त ध्यानमा
जब भावनाको उर्वरताबाट
शब्दबाट शब्द उम्रिए
शब्दबाट वाणी
मुखबाट मुखमा स्वास दिएर गरेको पुनर्जीवनका माध्यमबाट
अवसरको एउटा पाठशाला
चुपचाप एक्कसी
आफ्नै पारामा काम गरिरहन्छ
सिर्जनविज्ञान मन पराउँछु
तप्किँदै गरेको पानीको थोपो
खोलाको न्यानोलाई समात्दछ
फूल र फललाई
सारङ्गी र बाँसुरीलाई
स्वर्गीय पलको
कोमल उज्यालामा
ल्याउनलाई
प्राकृतिक रङहरू
आपसमा बाँडेर देखेका सपनाहरू
तिम्रा भावनाका लागि एउटा फूल
मेरा रहरका लागि एउटा फल
सौन्दर्यको सुखानुभूति
साथीको मुस्काइरहेको अँगालो ।
