साला के टी.वी. / संजीव कुमार 'मुकेश'
जउन दिन से साला भेजलक 40 इंच के टी.वी.।
ओहि दिन से गिरगिटी बाला रंग धइलका बीबी.
भोरे-भोर हनुमान चलिसा नञ् बजतो!
अब बजतो फ़िल्मी गाना।
मोहना के दोकान पसंद नञ्,
मॉल में बढ़लो आना-जाना।
कभी लगाबूँ पेन ड्राइब आऊ,
कभी लगाबूँ सी.डी.।
जउन दिन से साला भेजलक 40 इंच के टी.वी.।
ओहि दिन से गिरगिटी बाला रंग धइलका बीबी.
बुतरून के नञ् याद हो पढ़ना,
याद नञ् लिखना, टास बनाना।
कार्टून-गेम में बीजी हरदम,
याद नञ् खाना, दूध पीलाना।
कभी माय के फोन आ गेलो,
कभी भौजी में बीजी.
जउन दिन से साला भेजलक 40 इंच के टी.वी.।
ओहि दिन से गिरगिटी बाला रंग धइलका बीबी.
सास-पुतहु में खुब होबऽ हल,
गुपुर-गुपुर गलबात।
ननद-भौजी के सिरियल से अब,
बिगड़ल पुरा बात।
केकरा मानु अप्पन दादा,
केकरा कहूँ करीबी.
जउन दिन से साला भेजलक 40 इंच के टी.वी.।
ओहि दिन से गिरगिटी बाला रंग धइलका बीबी.
टी.वी. के चक्कर में,
मंझला साढू फूल के ढौंस।
छूछे बड़का पैकेज के ऊ,
जमबे खाली घौंस।
कभी देखाबे आईफोन,
आऊ कभी कार्ड सौ जी.बी.।
जउन दिन से साला भेजलक 40 इंच के टी.वी.।
ओहि दिन से गिरगिटी बाला रंग धइलका बीबी.
देख! भइबा ससुराल से नञ् कोय,
अबसे मांगीहें भीख।
हमर जीनगी बिगड़ गेल हे,
तो सब जइहा सीख।
दहेज पाप हे शान से जीअऽ,
नञ् बनीहऽ परजीवी.
जउन दिन से साला भेजलक 40 इंच के टी.वी.।
ओहि दिन से गिरगिटी बाला रंग धइलका बीबी.
