नीमड़ो / कन्हैया लाल सेठिया
अमरित रस रो
झारो नीम,
मीठो लागै
खारो नीम,
अणसारां रो
सा‘रो नीम
थारो है
पतियारो नीम,
रोग असाध
नसावै नीम,
मरता मिनख
जिवावै नीम,
शूरा शरणै
आवै नीम,
मोटा घाव
सुखावै नीम,
थाक्यां नै
सैळावै नीम,
ठंडी छंया
बिछावै नीम,
राधा किसन,
हिंडावै नीम,
गीतां में
गम ज्यावै नीम,
जठै कठै
उग ज्यावै नीम,
मरू स्यूं हेत
निभावै नीम,
जामण ऊपर
वारै नीम,
लुळ लुळ घणो
जुंहारै नीम,
आभै नै
ललकारै नीम
ऊँचा हाथ
पसारै नीम
डांफर सवै
दिगम्बर नीम,
लू लिपटावै
तरवर नीम,
कद निसखारौ
नाखै नीम ?
छाती करड़ी
राखै नीम
चैत लगातां
ऊलै नीम,
हीरक मींझर
फूलै नीम,
नीलम पन्नो
हरियल नीम,
तांबां वरणी
कूंपळ नीम,
मधु सौरम
मैकारै नीम,
मोमाख्यां
भणकारै नीम,
रतन निबोळ्यां
ल्यावै नीम
पाक्यां कनक
लजावै नीम,
आंध्यां में
सूंसावै नीम,
मेहां नेहां
न्हावै नीम,
पांख पंखेरू
वासो नीम,
सैं‘रो मामो
मासो नीम,
उपगारी
बनवासी नीम,
बणग्यो
गांव निवासी नीम,
म्हारो है
पाड़ोसी नीम,
समदरसी,
संतोषी नीम,
सगुण निगुण
संन्यासी नीम,
म्हारी मथरा
काशी नीम,
कळप बिरछ
उणियारै नीम,
नचिकेता
जमद्वारै नीम,
नीलकंठ
विष मारै नीम,
कद कोई स्यूं
हारै नीम ?
थारो सफळ
जमारो नीम,
जस रो घुरै
नगारो नीम,
पण तु बेली
म्हारो नीम,
दे स्यूं मैं
रैकारो नीम !
