भारत की संस्कृति के लिए... भाषा की उन्नति के लिए... साहित्य के प्रसार के लिए
भाव, आखर अर कविता / महेन्द्र मील
Kavita Kosh से
Neeraj Daiya (चर्चा | योगदान) द्वारा परिवर्तित 16:49, 13 मई 2014 का अवतरण ('{{KKGlobal}} {{KKRachna |रचनाकार=महेन्द्र मील |संग्रह=मंडाण / नीरज ...' के साथ नया पन्ना बनाया)
म्हारै हियै में
भावां रो भूंगळ्यो बैवै
आखर-आखर ऊकळै
छंद-बंध छिटकाय
तातै हिवड़ै नैं सरसावण
जेठ री पैली बिरखा ज्यूं
कविता
कागद माथै दड़ादड़ औसरै।
कविता मंड्यां पछै
अंतस में धपळको उठै
मोकळा भाव सांचरै
भावां रै ओळै-दोळै
कविता रो कपास कातीजै।
आखर
जूना आखर
भाळ पड़्योड़ा
तूटी टापरी में सिसकै
अर भाव
भूंगळ्यै ज्यूं
रिंधरोही में भटकै आखरां सारू
पण आखर लाधै कोनी
ओ तो अबखो कारज
आ ई तो ऐ’ळी सोध
कियां पार पड़ै!
कागद रै कोठै
आखरां री आंट सूं
स्याही री संकळाई रै पाण
कविता रा कमठाण रोपीजै,
जद-जद जागै
अंतस री ऊरमा सूं
भावां रो भूंगळ्यो
तद कविता रचीजै।
