धोरां धोरां पाळां पाळां (गीत) / देवदास रांकावत
धोरां धोरां - पाळा पाळां बैवतो जाऊंलो।
म्हैं मरुधर री मीठी बातड़ल्यां कैवतो जाऊंलो।
अरे कैवतो रे, अर कैवतो रे, हां कैवतो जाऊंला।
ई मरुधर री माटी मांडी लाखूं ई रतन मिल्योड़ा है।
ऊंचा-ऊंचा धोरा बण हीरां ज्यूं हार जड़्योड़ा है।
इण्री ऊंची आंणां ऊपर लूंठा वीर लड़्योड़ा है।
बीं वीरां रै लोही सूं ऐ सिल्लालेख लिख्योड़ा है।
ई लेखां रै लीकां री ईं जोधावां अर बीकां री डूंगी डेरियां- ढाळां ढाळां।
डूंगी डेरियां – ढाळां ढाळां, धोरां धोरां – पाळां पाळां बैवतो जाऊंलो।
म्हारै मरुधर री मीठी बातड़ल्यां कैवतो जाऊंलो।
ई री आण्यां रजपूताण्यां सिर हाथां सूं बाढ्यो हो।
साजन नैं सैनानी दै माथो मरुधर रै चाढ्यो हो।
हाडी राणी री हिम्मत ही की बीं तो मरणो मांड्यो हो।
ई ऊंचोड़ी आण्यां री बीं रजपूती राण्यां री, लांबै तालां – गाळां गाळां।
लंबै ताळां –गाळां गाळां, धोरां धोरां – पाळां पाळां बैवतो जाऊंलो।
म्हारै मरुधर री मीठी बातड़ल्यां कैवतो जाऊंलो।
मेवाड़ी राणै नैं पीथळ पाती भेजी खारी।
राजस्थानी वीर बांकड़ा तै आछी हिम्मत हारी।
नानो-सो बाळकियो रोयो, क्यों रोई रजपूती थारी।
हिम्मत रा हाथ दिखां ओरूं तूं बात राखलै म्हारी।
बीं पीथळ री पातां री, ईं लूंठोड़ी बातां री, पा’ड़ां पा’ड़ां – खाळां खाळां।
पा’ड़ां पा’ड़ा – खाळां खाळां, धोरां धोरां – पाळां पाळां बैवतो जाऊंलो।
म्हारै मरुधर री मीठी बातड़ल्यां कैवतो जाऊंलो।
ई मरुधर रा घूंघट गैरा रैवै गोरी गोरड़्यां।
खेजड़ीयां खूंखाड़ा मारै मीठै बोरां री बोरड़्यां।
झूठां झाड़ै मईंया आडै काळै कांठै री टोरड़्यां।
पिऊ पिऊ बोल मोरियां नाचै, सागै नाचै मोरड़्यां।
ई घूंघट रै गटकां रा, बीं मोरियां रै लटकां रा, बांठ बोरड़ी – जाळां जाळां।
बांठ बोरड़ी – जाळां जाळां, धोरां धोरां – पाळां पाळां बैवतो जाऊंलो।
म्हारै मरुधर री मीठी बातड़ल्यां कैवतो जाऊंलो।
ई धोरां रो धान सांवठो मोठ बाजरो बावै।
मेवो मिसरी जैड़ो मीठो भांग मतीरो खावै।
मोठ बाजरै रै मेळ्यां सूं खीचड़ियो रंध जावै।
धी घाल्यां सूं बो खीचड़लो कानूड़ो भी खाबै।
ईं धोरां आळै धानां रो, बीं मुरली आळै कानां रो, छानां झूंपड़ा – साळां साळां।
छानां झूंपड़ा- साळां साळां, धोरां धोरां – पाळां पाळां बैबतो जाऊंलो।
म्हारै मरुधर री मीठी बातड़ल्यां कैवतो जाऊंलो।
