भारत की संस्कृति के लिए... भाषा की उन्नति के लिए... साहित्य के प्रसार के लिए
सांवण री डोकरी / कन्हैया लाल सेठिया
Kavita Kosh से
आशिष पुरोहित (चर्चा | योगदान) द्वारा परिवर्तित 22:01, 16 जून 2014 का अवतरण ('{{KKGlobal}} {{KKRachna |रचनाकार=कन्हैया लाल सेठिया |संग्रह=मींझर ...' के साथ नया पन्ना बनाया)
धरती ऊपर कुदरत नाख्या
अै मुखमल सा बीज ?
लाजां मरयो गुलाल, रगत रै
लागी तालामेली,
हुई हींगळू आकळ बाकळ
ऊखा आभै भेळी,
रोळी रूळगी आंरै आगै
चिरमी कांई चीज ?
धरती ऊपर कुदरत नाख्या
घणां सुंरगा बीज ?
चुड़लो हुयो बिरंग, कसूमल-
आंगी मनां उतरगी,
मैंदी घणी उदास, चूनड़ी-
जाबक फीकी पड़गी,
रीसां बळती गई गोरड़ी-
मोढ़ण ऊपर कुदरत नाख्या
अै मुखमल सा बीज।
सांवण री डोकरड़ी फड़दी
दूजो मेळ न मिलसी,
आं री रंगत आगै माणक
मूगा लूकता फिरसी।
लालां रो निज री लाली पर
रयो न धीज पतीज,
धरती ऊपर कुदरत नाख्या
घणां सुरंगा बीज ?
