भारत की संस्कृति के लिए... भाषा की उन्नति के लिए... साहित्य के प्रसार के लिए
काळबेळियो / कन्हैया लाल सेठिया
Kavita Kosh से
आशिष पुरोहित (चर्चा | योगदान) द्वारा परिवर्तित 22:06, 16 जून 2014 का अवतरण ('{{KKGlobal}} {{KKRachna |रचनाकार=कन्हैया लाल सेठिया |संग्रह=मींझर ...' के साथ नया पन्ना बनाया)
लियां काळ री कावड़ कांधै
काळबेलियो आवै।
किंयां मौत स्यूं ओ पोखै है
देखो रै जिनगानी?
खाली हाथां नाग नाथियो
विष री लकब पिछाणी,
जग रै भै नै किसब बणायो
ईं रै पाण कमावै,
लियां काळ री कावड़ कांधै
काळबेलियो आवै।
पड़यो पताळां बारै आयो
पूंगी री धुण सुणतां
जबर निजर रो खेल, फेर के
लागी ताल पकड़तां ?
डरै जको ही मरै, नही तो
कुण कोई नै खावै ?
लियां काळ री कावड़ कांधै
काळबेलियो आवै,
डंक मारणूं भूल बापड़ो
निज रो जीव लकोवै,
काळ कळा रै आगै निमळो
सामूं टग टग जोवै,
हुयो हूकम रो चाकर फणधर
जोगी नाच नचावै,
लियां काळ री कावड़ काधै
काळबेलियो आवै।
