पद 81 से 90 / कन्हैया लाल सेठिया
81.
मानस मोती चुगणियां
हंस बसै उतराध,
फिरता फिरै मुसाण में
भखता काग सराध !
82.
बन्द पींजरै बापड़ो
रटै सुवटो राम,
बो निसपापी पण पड़ै
पाप्यां कानां नाम !
83.
कसतूरी मृग नाभ में
मोती खारै नीर,
चन्नण उगै उजाड़ में
सबद गहन गंभीर !
84.
लैरां भागै रैण दिन
बिसराई कुळ काण,
आपो भांगै कद समद
सींव अटळ सत पाण !
85.
च्यार पोर सूरज तपै
पख भर चांद उजास,
चनेक पळको बीज रो
आतम दिवलो चास !
86.
पैल हुयो परमाद में
पड़यो करै असळाक,
मदगैला गेलै बगै
अणचिंत्यो बजराक !
87.
खोद ऊंदरा बिल करै
जा बैठे परडोट,
भैंस धणी बो हाथ में
हुवै जकै रै सोट !
88.
सरप भाज बिल में बड़यो
लीक छूटगी लार,
बैरी बणग्यो जीव री
काया रो आकार !
89.
बाथ घाल ली मोहवष
बा ही बणगी हुण,
हूवो घड़ो रीतो भरयो
भुवैं एक सी भूण !
90.
रामधणख रै छन्द में
बादळ रो अनुवाद,
जाणै आभै में खिली
धरती री फुलवाद !
