भारत की संस्कृति के लिए... भाषा की उन्नति के लिए... साहित्य के प्रसार के लिए
नैणां में तिरै सुपना / संजय आचार्य वरुण
Kavita Kosh से
आशिष पुरोहित (चर्चा | योगदान) द्वारा परिवर्तित 22:32, 25 फ़रवरी 2015 का अवतरण
म्हारै हियै जियै रै
आसै पासै
भणभाणवै
म्हारा सुपना
म्हारी इच्छावां
म्हारी आख्यां रै
पाणी में तिरता सुपना
कदे डुब जावै
कदे तिरता दीसै।
इसा सुपना
जका
काळ रै तावड़ै सूं
वरदरंग हुयोड़ै
कपड़ै ज्यूं
काळजियै में
उठण आळी
काळी पीळी आंधी में
फगत लैरावै
उड नीं सकै
तणीं सूं
बंध्योड़ा हुवण रै कारण।
नैणां रौ पाणी
बैंवतो बैंवतो
कदे न कदे तो सुखै ई’ज
अर सुपना हुय जावै
बूसीज’र भेळा
सूखो खेलरौ
बण्योड़ा सुपना ने
कदे न कदे
उडा’र ले जावै
तेज पुन रौ लेरको
आपरै सागै
ना जाणै कठै
किण ठौड़?
