भारत की संस्कृति के लिए... भाषा की उन्नति के लिए... साहित्य के प्रसार के लिए
थारै पछै (1) / वासु आचार्य
Kavita Kosh से
आशिष पुरोहित (चर्चा | योगदान) द्वारा परिवर्तित 16:27, 26 फ़रवरी 2015 का अवतरण ('{{KKGlobal}} {{KKRachna |रचनाकार=वासु आचार्य |संग्रह=सूको ताळ / वास...' के साथ नया पृष्ठ बनाया)
क्या हुयौ
क्या नीं हुयौ
क्या सूं क्या हुयग्यौ
धरती पिघल‘र
बणगी दरियाव
छायगी सून च्यांरूमैर
बै सै ठौडा
जाणै ज्वालामुखी रै
धधकतै लावै मांय
भसम हुयगी
जठै कदै-कोई सुपनो
कोई ‘लैरियौ’
कोई ‘मोरियौ’
आपरै ई सुरताळ मांय
गूंजतौ हो
पून रा लैरका सागै
म्हैं जीवू तो हूं
बिया‘र बिया
लागण मांय ओई लागै
दीखण मांय भी
कीं नीं दीखै
सौ की सावळ‘ई लागै
पण म्हारो-ओ बगत
उबळतै तैल रै
कड़ाव सूं बतौ‘ई है
जिण मांय तिल तिल
बळतौ जाय रैयौ है
म्हारो रूं रूं
साची बात तो आ है-
क मनै ठा इ नीं
लाग रैई है
क कोई मुड़दो
जी रैयौ है -
म्हारै मांय
या कोई मुड़दै मांय म्हैं
थारै पछै
थारै पछै
