भारत की संस्कृति के लिए... भाषा की उन्नति के लिए... साहित्य के प्रसार के लिए
कदतांई है ! ईस्वर ? / वासु आचार्य
Kavita Kosh से
आशिष पुरोहित (चर्चा | योगदान) द्वारा परिवर्तित 13:06, 28 फ़रवरी 2015 का अवतरण
रंग बिरंगा
उजास अर अंधारा सूं
गुथमगुथ हुवती आत्मा
रगत रो
अेक टोपो टपकै बिना
लौवुलुवाण हुयौड़ै सरीर नै
ढौवै है रात दिन दिन रात
समधां री नस नस मांय
चमकता तीखा काकरा
दीखै दूर सूं पाणी री लै‘रा
नीं ठा क्यूं
जंगळ मांय तिरसा मरतौ
भागतौ न्हांसतौ
फंफैजियौड़ौ हिरणियौ
रै रै‘र आवतौ रै
म्हारी चैतणां मांय
तो क्या
छोड़ दूं जौवणौ
सूका कुवां मांय पाणी
मीठौ पाणी
जका कदै बुझावता हां
ठैठ उण्डै ताई
मानखै री तिस
मिनखाचारै री उण्डी प्यास
तो क्या बदळतै
आज रै बगत सागै
बासती दम घौटती हवा
नीं हुवैली पाछी
मधरी मैहकदार पून
तो क्या नीं मिटैला
आज रे नकली उजाळै मांय
बधतो अंधारो
सुकड़तै आदमी रै
भैळै हुवतै हियै जियै
कदतांई चालैला
आ गुथमगुथ
कदतांई ढौवणौ पड़सी
रगत रो
अेक टोपो टपकै बिना
लौवुलुवाण सरीर नै
कदतांई हे ! ईस्वर ?
