आपां रै नांवै / सत्येन जोशी
आपां रै नांव सूं
वे मूंडा मचकोळै
पण चलावै है सैं कारोबार
आपां रै नांवै
सालोसाल कतरै केस
मनावै उच्छब
ढोल रै ढमकै
अर आपां
राज-खुशी सीस निवाय
करां वांरी जै-कार
माई-बाप
आप हौ
रोटी-बाटी रा देवाळ
धरम री धजा
करम रा किरतार
समझां-जीवण
बेवै है ढाळोढाळ
आपां रा नांव-उपनांव
कठैई कोरीजै नीं मंडीजै
पण गाईजैला गीत
आपां री बिड़दावली रा
दिरीजैजा आपां री मिसाल
पण निजू की नी व्हैला
म्हारौ-थारौ उणरौ
आपां री पैचाण बस व्हांला
फगत आपां
रोपीजैला आपां री ओळू री थांबलियां
जठै दो घड़ी मून धार
अेक मजमौ करैला आपां रौ बखांण
आख्यातां री अैद उठा’र
उछाळीजैला नारा
सराइजैला आपां रा घाव
अर बगत री मार सूं
घायल व्हियोड़ी आपां री औलादां रा चैरा
करैला पळपळाट
बुझती जोेत री लौ दांई
अर फेरूं
जीवण री अबखायां सूं जुंझण सारूं
व्हे जावैला त्यार
देस नांव रै जजबै रै सैनांण
व्हे जावैला बलिदान
आपां रै उनमांन
फेर कोई बौपारी
खौलैला दुकान
ले’र सरकारी अनुदान
आपां रै नांवै
