हेर्नुस् न ! / ज्ञानुवाकर पौडेल

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

ज्ञानुवाकर पौडेल »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

जिन्दगी छैन अचेल जिन्दगी जस्तो हेर्नुस् न !
मान्छे भो आज यहाँ कति सस्तो हेर्नुस् न !!

हत्या र ध्वंशका यी क्रुर शृंखलाहरू किन ?
सुनेर पनि सब गर्छन् नसुने जस्तो हेर्नुस् न !!

कुरा चपाउछन् कोही यहाँ हाम्रो खुट्टा तान्छन्,
दुनियाँमा हुन्छ के अन्त पनि यस्तो हेर्नुस् न ?

बाँचियो जिन्दगी यो ख़ुब मजाले भोगियो पनि,
जिउनुको स्वाद छ तर कति निस्तो हेर्नुस् न !!

पुरानो चोट बल्झेर आयो फेरि आज दुखेर आयो
कहिल्यै बिसेक नहुने घाऊ यो कस्तो हेर्नुस् न !!

कटुवाल बिते, भूपि बिते, बितिन् पारिजात पनि,
मलाई’नि हिजोआज सन्चो छैन उस्तो हेर्नुस् न !!