भारत की संस्कृति के लिए... भाषा की उन्नति के लिए... साहित्य के प्रसार के लिए
तिहार र देश / विक्रम सुब्बा
Kavita Kosh से
Sirjanbindu (चर्चा | योगदान) द्वारा परिवर्तित 08:19, 28 मई 2017 का अवतरण ('{{KKGlobal}} {{KKRachna |रचनाकार= विक्रम सुब्बा |अनुवादक= |संग्रह=...' के साथ नया पृष्ठ बनाया)
बन्दुक धेरै भुकेकाले कागहरू
अचेल गाउँ-घरतिर आउँदैनन्
यसपाली त तस्बिरै राखेर
काग-पूजा गर्न छोरीलाई भन्नु पर्ला
धेरै भइसक्यो वस्तुभाउहरू गोठमा
असुरक्षाको नुन-पानी खाएर दुब्लाएका छन्
कोरली-बाच्छीहरू बम-गोलाले सोत्तर भएका छन्
गाईको सट्टा यसपालि
कूश राखेरै लक्ष्मी पूजा गर्न
श्रीमतीलाई भन्नु पर्ला
चाढ आइसक्यो केही ग-या छैन
ज्यान जोगाउँदै केही भ्याएको छैन...
हेडमास्टरको कुर्सीछेउमा
अपहरणको छाँयाले हात लम्काउँछ
बेरोजगार मृत्यु काम खोज्दै
मर्निङवाकमा सबेरै भेटिन्छ
चुलाहरूमा त्रासको आगोले
सेल-रोटीहरु पाक्न नसकेर धुवाँउँदैछन्
देशवासी हो ! होसियार !!
मुलुकको लम्पसार मानचित्रको शिरमा अचेल
नयाँ नयाँ शिर्षकहरू दाउ खोज्दैछन्
तिहार त गए पनि अर्को वर्ष फेरि आउला
तर एकचोटि कतै गएपछि फर्केर आउँदैन देश ।
