सेतो हिमाल मेरो सिरानी / निमेष निखिल

सेतो हिमाल मेरो सिरानी पहाडको सुन्दर घर
लोकभाका घन्काउँदै तराई घुम्ने मेरो रहर

छातीभरि लालीगुराँस भृकुटी र भक्ति थापा
साहस र शान्ति हामी नेपालीको गौरवगाथा

सेवा गर्नु धर्म हाम्रो जात हाम्रो नेपाली
चोमोलोङ्मा शिरमाथि सुहाउँछ छानो हिमाली

चन्द्रसूर्य ध्वजा बोकी शान्तिगीत घन्काउँछौँ
परिश्रमका पसिनाले आफ्नै माटो भिजाउँछौँ।