सुणै कुण / मधु आचार्य 'आशावादी'

सुणी ही
लोग कैवै भी है
भींतां रै ई कान हुवै
इण खातर हर बगत
सोच’र कीं बोलणो।

पण
लारलै केई बरसां सूं
राजधानी मांय
लोग हाका करै मूंघाई रा
किरसा रोवै बळती फसल सारू
पण राज करणिया देखै-सुणै
खाली करता रैवै
थारी-म्हारी।
कान तो बां रै ई है
फेर बै क्यूं नीं सुणै!
हाका कर’र
माडाणी सुणावणी पड़ै बांनै बातां
भींतां तो सुण लेवै
ओलै-छानै री ई बातां
फेरूं
मिनख किणनै मानां
भींतां नै, कै
राज करणियां नै!