कळां भखै मिनखपणों / इंदिरा व्यास

कुण कैवै
कळां मिनख हेत सारू
बणी अर तणी है
कळां री सोरफ सूं
दोरफ ई बधी है
मिनखपणैं सारू

कळां रोपै
जुध अर जुध
भाई-भाई सूं / देस-देस सूं
कळां रै जोम ई बधै
जग में आतंकवाद
लूंटीजै पौलिंग बूथां माथै
लोकतंत्तर री देवी

कळां ई भख रैई है
बैन-बेटी / भूआ-मासी
अर ऐड़ा ई कई दूजा नाता-रिस्ता
कूखां में आवण सूं पैली अर पछै
कळ-कळ नीं
कोई राखसियो बळ है
जिको बधतोई जाय रैयो है
मानखै नैं लगोलग भखतो।