नैणा रा बोल / वाज़िद हसन काज़ी

पैली प्रीत
नीं भूलीजै
अेक-अेक पल छिन
अेक-अेक दिन
बीत्यौ
अेक-अेक बरस ज्यूं

बात पुराणी होयगी
पण अजै
साव नुवी है
म्हारी प्रीत
जाणै आज री
इण सायत री

भलां ई नीं दरसायी
थां रै सांमी
उण नैं
पण है म्हनैं
पूरौ विस्वास
के
थां जद ई जाणता
म्हारै मन री बात
अर आज ई जाणो
थां भलां ई मत कैवौ
पण थांरा
हिरणी रै गळाई मुळकता
डाबर नैण
सै की कह देवै
म्हनै

अर म्है सहज सुण लूं
थांरै नैणा रा
अण बोल्या बोल।