कसरी भनूँ म बाँचें ? / हरिभक्त कटुवाल

बन्धन र बाध्यतामा बाँच्नु पनि के बाँच्नु ?
आँसु लुकाई गहमा हाँस्नु पनि के हाँस्नु ?
यो घर जहाँ म बस्छु यो भित्ता चर्किँदैछ
सायद यो ढल्नलाई भैँचालो पर्खिँदैछ
छोरो आफैँ बनाउला उसलाई चाहिने घर
गर्दै होला ऊ अहिले भैंचालो ल्याउने तर्खर ।

ऊ आँधीसित खेल्छ म आँधीमा डराउँछु
सायद ऊ आउनुभन्दा म पहिले नै हराउँछु
यसै गरेर हरदम म भित्र एउटा मान्छे
जिउनै नजानी मर्छ कसरी भनूँ म बाँचे ?