भारत की संस्कृति के लिए... भाषा की उन्नति के लिए... साहित्य के प्रसार के लिए
स्वीणा मा / आशा रावत
Kavita Kosh से
Abhishek Amber (चर्चा | योगदान) द्वारा परिवर्तित 20:22, 16 मार्च 2018 का अवतरण ('{{KKGlobal}} {{KKRachna |रचनाकार=आशा रावत }} {{KKCatGadhwaliRachna}} <poem> वा फगत स्वी...' के साथ नया पृष्ठ बनाया)
वा फगत
स्वीणा मा देखद
वींकू जवैं
ऐग्ये घौर,
वेतै
यखि मील ग्ये
क्वी काम इनु
कि
अब जर्वत नि होली
अपणु प्यारु घौर
अपणु न्यारु पाड़
छोड़िक
बूण जाणा की ।
स्वीणा मा ही
देखणी रैंद
अक्सर वा लाटी
अर जु कबि
फज़ल लेकि औंदु
यो स्वीणु
त खुश हूंद
कि फजल को
स्वीणु छ
सच त होलु
जरूर
एक न एक दिन ।
नि जणदी वा
वींका स्वीणा तै
सच करण मा
बोगि जालो
सरा तंत्र को पस्यो ।
सड़कि से
इतगा दूर बस्यां
ये गौं मा
को लगाल कारखनु,
भले बण जाव
जून- सि उज्यलि सड़क ।
यख त कबि
धसणू रैंद पाड़
त कबि
गरजद छ द्योर
बरस जांद कठा,
कबि रिख बाघ
कि डैर
त कबि कुछ हौरि ।
इनमा
कनके ह्वाव
क़्वी ढंगौ काम ।
नि देखदी वा
रात खुलणा का
दगड़ी दगड़
टुट जांद स्वीणो,
ह्वे जांद उज्यलो
दिखेन्द सब साफ-साफ
कि जो अबि छ
बस वी छ।
