पहाडै खैरि / अश्विनी गौड 'लक्की'
हमारा यूं पहाडूंकि खैरि,
कैनबि क्या जाणी
र्वोदा डांडयूं का आंसू,
कैन पछांणी।
हैंसदु ह्यूं चळकुदु द्येखि,
यूं डांडिकाठयूं टुक्क मा,
दुखका ताप गौळि जांदु,
कैनबि क्या जाणी ।
घाम खतेंदु-छिरदु द्येखि,
यूं डांडिकाठयूं धार प्योट,
पूष-मो, मैनों जड्डू,
तौंन निवाता मा क्या जाणी ।
पठ्ठाळि धुर्पळै चोंदि,
बर्खा बूँद अर बत्वाणि,
उनिन्दि कन कटेंदि राति,
तौंन क्या जाणी ।
गाजी घास खांदि देखि,
गुठ्यार अर खर्क मा,
घास ल्योण, बौंण जाण,
कैन बि क्या जाणी ।
बगदि गाड़ ओंदि देखी,
ऐंच हिवाळि डांडि बै,
सूख्या, निरपण्या पंध्यारे तीस,
तौंन क्या जाणी ।
गाड-गदर्यूं पाणि द्येखि,
ख्यळयूं मा रंगमत बण्यूं
बसग्याळ रोला-बोला बगदा,
तौंन क्या जाणी ।
अडगदि दनकदि सडक्यूं,
चलाचलि मा ऐंन सि,
उकाळि-उंद्यारा का संगडा बट्टा,
हिटणे तौंन क्या जाणी ।
हैऽरि सार्यूं बीच हैंसदि,
ग्यूं-सटयूं बालुडि,
अचणचक्क ढांढु पडि जांदु
तौंन क्या जाणी ।
हमारा यूं पहाडूंकि खैरि,
कैनबि क्या जाणी
र्वोदा डांडयूं का आंसू,
कैन पछांणी।
