भारत की संस्कृति के लिए... भाषा की उन्नति के लिए... साहित्य के प्रसार के लिए
लिखूं खेत री पाटी माथै / मोनिका गौड़
Kavita Kosh से
आशिष पुरोहित (चर्चा | योगदान) द्वारा परिवर्तित 17:56, 8 अप्रैल 2018 का अवतरण ('{{KKGlobal}} {{KKRachna |रचनाकार=मोनिका गौड़ |अनुवादक= |संग्रह=अं...' के साथ नया पृष्ठ बनाया)
थे रचो
आखरां रा भाखर
चितारो मन री रूमानियत
कविता रै संचे
उगेरो
प्रेम-गीत
बायरै रै पंखै सागै
समदर री हिलोळां लिखो
अणगिण पोथियां
बणाओ
नूंवा सिलोक नीति रा
मिनखपणै री जूण-जातरा रै चितरामां भरो
नेह रा इन्द्रधनखी रंग
पण म्हैं माटी रो मोट्यार
लिखूं खेत री पाटी माथै
हूंस रै बरतै सूं
जरूरत री ओळ्यां
बाजरी रै सिट्टां में रचीजै
भूख-रिचावां
खळो काढतां बण जावै
पसेवै री गजल
मत्तै ई
तिरपत आत्मावां चितारै
प्रीत रो महाकाव्य
म्हैं
नीं अंवेर कै रच सकूं
प्रेम री पोथ्यां
दुनियावी उणियारै!
