भारत की संस्कृति के लिए... भाषा की उन्नति के लिए... साहित्य के प्रसार के लिए
मन रा मीठा मानवी / मानसिंह राठौड़
Kavita Kosh से
आशिष पुरोहित (चर्चा | योगदान) द्वारा परिवर्तित 17:32, 25 जून 2018 का अवतरण ('{{KKGlobal}} {{KKRachna |रचनाकार=मानसिंह राठौड़ |अनुवादक= |संग्रह= }...' के साथ नया पृष्ठ बनाया)
।।१।।
हिलमिल रहत हमेश,होवै भेळा बाथ भर ।
करै नहीं'र कलेष,मन रा मीठा मानवी ।।
।।२।।
वैरी बोले वैण,करै रिछाई सुण नहीं ।
संतां हन्दा सैण,मन रा मीठा मानवी ।।
।।३।।
चौपाळां रो चाव,बैठ हथायां मिळ करै ।
भरै प्रेम रा भाव,मन रा मीठा मानवी ।।
।।४।।
नेणों अणहद नेह,देय अनूठो ओळबो ।
मनवारां रो मेह,मन रा मीठा मानवी ।।
।।५।।
अमट रखै आबाद,पूछै सुख अर दुक्ख री ।
मिनख तणी मरजाद,मन रा मीठा मानवी ।।
।।६।।
पल पल 'मान'पिलाय,प्याला नित रस प्रेम रा ।
राखै हिये लगाय,मन रा मीठा मानवी ।।
