भारत की संस्कृति के लिए... भाषा की उन्नति के लिए... साहित्य के प्रसार के लिए
म्हैं तो पाणीं रा आखर हां मिट जासां / लक्ष्मीनारायण रंगा
Kavita Kosh से
आशिष पुरोहित (चर्चा | योगदान) द्वारा परिवर्तित 12:31, 23 जुलाई 2018 का अवतरण ('{{KKGlobal}} {{KKRachna |रचनाकार=लक्ष्मीनारायण रंगा |अनुवादक= |स...' के साथ नया पृष्ठ बनाया)
म्है तो पाणीं रा आखर हां मिट जासां
म्है तो बाळू री लै‘रां हां मिट जासां
अकास गरीबी री अगन सूं जळतो पानों
दुख-बादळ रा दसखत हां मिट जासां
खेजड़ी री सांगरी ज्यूं चुटै आ जिन्दगी
सांसां रा सूखा खोखा हां खिर जासां
जीवण रै जंगळ भटकै तिरसा मिरगला
आसा-दरपण रा चै‘रां हां मिट जासां
बिन रोटी रै तवै दांई जळ री जिन्दगी
भूखी भींतां रा छापा हां मिट जासां
लू रै लपकरां दांई गुजर री आ जिन्दगी
सांसां-संतरंज रा मोहरां हां पिट जासां
तीखा कांटां सूं बिंध्यो बाग रो रूं रूं
फूलां रै लोई रा छाटां हां मिट जांसां
जन-जीवण बण्यो राजनीति री चौपड़
वोटां बिकयोड़ी गोट्यां हां पिट जासां
