भारत की संस्कृति के लिए... भाषा की उन्नति के लिए... साहित्य के प्रसार के लिए
सुण म्हारा इस्ट! (पांच) / राजेन्द्र जोशी
Kavita Kosh से
आशिष पुरोहित (चर्चा | योगदान) द्वारा परिवर्तित 22:24, 24 जुलाई 2018 का अवतरण ('{{KKGlobal}} {{KKRachna |रचनाकार=राजेन्द्र जोशी |अनुवादक= |संग्रह=...' के साथ नया पृष्ठ बनाया)
म्हारा इस्ट, सुण!
म्हनै घणो अचरज हुवै
जद थनै सोधण सारू
भटकता फिरै गळी-गळी
बाखळ रै बिचाळै
समदर रै ऊंडै
सीप्यांं-संखां नै भेळा लेय'र
मछलियां रै लारै।
बांरो मन उळझतो-उळझतो
आभै कानी देखण लागै
डीगा-डीगा भाखरां कानी
बैवती अलकनंदा रोकै
थारो वास पूछण सारू
बा उछळती-नाचती अर
हंसती पाछी बैवण लागै।
कठैई अंधारै मांय
उजाळो करै धोरां बिचाळै
नीं सोधै आपू-आप मांय
जठै लुक्योड़ो बैठो है थूं
उणरो इस्ट...।
