अप्पन मइया के अँचरा के नय लोर तनिको ताकऽ हई.
देखऽ कलुआ अपन माय के बात-बात पर डांटऽ हई
दुध के घुट्टी याद नय हई,
मिरचाय के छौंका याद हकई.
मइया के सरदाल गेनरा नय,
सुखल चटइया याद हकई.
कैसे बेटबन माय-बाप के बैना जइसन बाटऽ हई.
देखऽ कलुआ अपन माय के बात-बात पर डांटऽ हई.
रे बेटा! कुछ खा के जइहें
नयऽ तो पीत गरमा जइतऊ।
पहले काया, फिर माया
पिछलग्गु बनके आ जइतऊ।
मैया के इ प्यार कहाँ कलुआ के तनीक सुहावऽ हई.
देखऽ कलुआ अपन माय के बात-बात पर डांटऽ हई
बेटा के बाबा सुट आल,
बेटी के सुनर लहँगा।
अपन लइलक जींस पैंट,
मेहरारू ले साड़ी महँगा।
घर में मइया-भाय-बहिन के सुखल पेड़ सन छाँट हई.
देखऽ कलुआ अपन माय के बात-बात पर डांटऽ हई
देख भइबा जइसन करमऽ,
ओइसन मिलतऊ उपहार में।
जइसन करनी ओइसन भरनी,
सब जाने संसार में।
माय-बाप हे सच्चा देउता,
ज्ञान ग्रंथ ई बाँटऽ हई.
देखऽ कलुआ अपन माय के बात-बात पर डांटऽ हई.