काहे ले तूँ जात पुछऽ हऽ / उमेश बहादुरपुरी
काहे ले तूँ जात पूछऽ हऽ भइवा हम तो बाभन ही।
समझऽ हथ हमरा सब सुक्खल पर हम भइया सावन ही।।
जब-जब आग लगल धरती पर हमहीं आग बुझइलूँ।
मर-कट रहल हल भाई-भाई तब हमहीं समझइलूँ।
समझऽ हऽ हमरा तूँ अछूत पर हम तो भइया पावन ही।। काहे ...
जालिम समझऽ हऽ हमरा तूँ खूनी तक समझऽ हऽ।
एकरो से जादे हमरा तूँ शोषक पुश्तइनी समझऽ हऽ।
हिअइ राम के वंशज हम न´् हम तो भइया रावण ही।। काहे ....
उगलाबऽ ही हीरा-मोती चीर के धरती के सीना।
लौह-पौरुष पिघलाबऽ ही बहाके खून-पसीना।
खुद्दे पियासल रहके, हम तो पिआस बुझाबन ही।। काहे ....
केकरो से भी लटर-पटर न´् न´् केकरो से खटर-पटर।
घुनुर-घुनुर बतियाबऽ ही न´् करऽ ही न´् फटर-फटर।
तूँ हमरा जे समझऽ पर हम तो भइया मन-भावन ही।। काहे ....
दिनकर अउ दिवाकर हम, सहजानंद सरस्वती हिअइ।
कहँय प्रभाकर भास्कर, हम पोरुष के बलवती हिअइ।
सब हमरा दागी समझऽ हऽ उज्जर हम तो दामन ही।।
