भारत की संस्कृति के लिए... भाषा की उन्नति के लिए... साहित्य के प्रसार के लिए
करक्वालै उड़ि गयीं / बोली बानी / जगदीश पीयूष
Kavita Kosh से
सशुल्क योगदानकर्ता ४ (चर्चा | योगदान) द्वारा परिवर्तित 07:13, 24 मार्च 2019 का अवतरण ('{{KKRachna |रचनाकार=भारतेन्दु मिश्र |अनुवादक= |संग्रह=बोली...' के साथ नया पृष्ठ बनाया)
करक्वालै उड़ि गयीं
बीति गै बरखा कै बेला
बूढ़े बरगद ते उठिगा है
चिरियन का मेला
बीति रहा हमरिही द्याँह पर
आजु कुँवारी घाम
केतनौ ध्यान धरौ ई बेरा
हुइ-हुइ जाति जोखाम
कातिक आय रहा
लरिकउनू घूमै निकरि लिहिन
हमरे जिउ का डारि गये हैं
बोउनी कयार झमेला
हाँथ पाँव मा जान नहीं है
हुइगेन ठवर-टक्करी
मुला काम की बेरिया है
घर बइठे आखिर का करी?
जब लौ पौरुख है
तब लौ कुछु ते कुछ कीन चही
कइसेव दाना परै ख्यात मा
हेय न ठैलिम-ठेला
नाते रिस्तेदार सबै हैं
लूटै का मुंहु बाए
राम-राम कइके दिन बीते
सेतुआ पिये-पियाए
अब बेसार का नाजु नहीं है
करजै लेक परी
आँसौं सूखा परा बचा ना
घर मा एकौ धेला
