भारत की संस्कृति के लिए... भाषा की उन्नति के लिए... साहित्य के प्रसार के लिए
डोले पवन पुरवइया रे / पीसी लाल यादव
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 22:59, 26 अगस्त 2019 का अवतरण ('{{KKGlobal}} {{KKRachna |रचनाकार=पीसी लाल यादव |अनुवादक= |संग्रह=मै...' के साथ नया पृष्ठ बनाया)
फर के मारे लहस गे हे डारा,
बइठे चिरइया बाँटत हवै चारा।
डोले पवन पुरवइया रे
संगी नाचे ता -थइया रे।
मरार बारी गोंदली के डुहरू।
दुहरू पलोवय पानी बुधरू॥
टेड़ा टेड़त बज गे बारा,
पठेरा म माड़े कुची-तारा,
डोले पवन पुरवइया रे
संगी नाचे ता-थइया रे।
आमा म कुहके कारी-कोयली,
टुरा बटकर धरे पयली-पयली।
भौजी डोहारे मुड़ी म भारा,
संझा बियारी झारा-झारा,
डोले पवन पुरवइया रे
संगी नाचे ता-थइया रे।
कोठार बियारा बंभरी के राचर,
मनमोहना के ददरियारंग झाझर।
ममा मतावय माटी के गारा
बढ़ई बबा चलाय आरा।
डोले पवन पुरवइया रे
संगी नाचे ता-थइया रे।
