आम्रपाली / युद्ध / भाग 6 / ज्वाला सांध्यपुष्प
कोनहारा पर हए बनल्, अर्द्धचन्द्रकार व्यूह।
आएत कट्टल जाएत ऊ दुश्मनो झुण्ड के झुण्ड॥51॥
दक्खिन गमे खड़ा बज्जी सऽ, छाती हबे उतान।
लगतन काटे दुश्मन के, बज्जत शन्ख लगातार॥52॥
सुरुज आँख पर आ गेल, अवाज न कन्हु होइअ।
एगो बाघ दोसर पर उ, रह-रह कअ गुर्राइअ॥53॥
बइठल सतघोरबा रथ, पर हथ राज विशाल।
मारे खातिर दुश्मन के, तइयार हए अजात॥54॥
मन्त्र पर्ह कऽ शंख बजएलक, सोमप्रभ उ घूमकऽ।
काली के कल जोड़कअ, श्री सिंह सुमिरलन कसकऽ॥55॥
शंख बज्जल, तलबार बज्जल, फुर्र ककऽ चिड़इ उरल।
जेन्ना धावक सिटिक सुन, सुर्र होकऽ उ दउड़ल॥56॥
बज्ज गेल तुरही, दुदुम्भी, रणभेरी बज गेल।
आनक, गोमुख बजइते, केत्ता तीर चल गेल॥57॥
डिम्-डिम्-डिम् बज्जे रणभेरी, तुत्-तुत् तुरही करइअ।
डम्-डम्-डम् नगारा बज्जे पर, भाला तीर चलइअ॥58॥
हाथी दउड़इअ गाछ सन्, खूब धुर्रा उड़इअ।
हिनहिनाकऽ घोड़ा छरपे, अन्हर में न बुझाइअ॥59॥
हाथी चिग्घरे अन्कुश पर, घोड़ा चोट लग्गे पर।
सैनिक गिरे पेड़ नाहित, टूटे रथ जइसे घर॥60॥
