द मेरा भै / सुन्दर नौटियाल
द मेरा भै तु पाड़ आई, सैरू छोड़ि तु पाड़ आई ।
धन हे भैजी तु पाड़ आई, मेरा पाड़ न क्या ली जाई ?
भट्टु कु भुजरांणि न पिसी, सिलोटा मा चटणी न घिसी ।
न घटु ग्यौं गैल कोदु पिसी, मकैं की रोटी न लाई घिची ।
बड़ी न चैंसु न फाणु खाई, द मेरा भै तु पाड़ आई ।
बंटा उठै कबि धारा मा गै ? न ना कब्बि न भै ।
धारों कु छोयों कु पाणि बि पे ? न ना कबि न रे ।
बांजा कि जड़यों कु पाणि नि प्याई, द मेरा भै तु पाड़ आई ।
उखल्यार कबि पिट्ठु न कुटी, अरसों कु स्वाद बि त्वैमा न छुटी ।
गौतु गौत्वाणी अर बिड़ुली रोटी, तिलु की चटणी पिसीं सिलोटी ।
द्यूड़ा न घिंजा न पापड़ी खाई, द मेरा भै तु पाड़ आई ।
धण्यां पालगौं कु मुछ्यार बणै ? नना मैं कैकी सग्वाड़ी नि गै ।
दै तरी गैल खटै बि खै ? भैजी मिनक कखि निमौं नि पै ।
ह्युंद कि रूड़्यों म खटै नि खाई, द मेरा भै तु पाड़ आई ।
सैणा छोड़ि खड़ी धार बि चड़ी ? न ना जर्रतै नि पड़ी ।
इगराळि बाटौं मा खुटी बि रड़ी ? सड़की मा थै मेरी मोटर खड़ी ।
खाणु त क्या त्वैन हवा नि पाई, द मेरा भै तु पाड़ आई ।
