भारत की संस्कृति के लिए... भाषा की उन्नति के लिए... साहित्य के प्रसार के लिए
घुमाउरा बाटाहरू / गीता त्रिपाठी
Kavita Kosh से
Sirjanbindu (चर्चा | योगदान) द्वारा परिवर्तित 11:52, 15 अप्रैल 2020 का अवतरण ('{{KKGlobal}} {{KKRachna |रचनाकार= गीता त्रिपाठी |अनुवादक= |संग्रह=...' के साथ नया पृष्ठ बनाया)
गाउँमा छँदा
उकाला-ओराला
तेर्सा-घुमाउरा बाटाहरू
बाटाका चुच्चे दर्शनढुङ्गाहरू
सबै-सबै मिलेर
हौस्याउँने गर्थे-सपनाको यात्रालाई
परिश्रम
पसिना
र
लक्ष्य
आकार बन्दैजान्थ्यो-जिन्दगीको भूगोलमा
एक जोडी परेवा
हरेक साँझको सिकुवामा
बास बस्न आउँथे
निर्धक्क निदाउँथे
र
सुन्दर सपना देख्थे
सल्लाह गर्थे- एउटा पक्की गुँड बनाउने
चल्लाहरू कोरल्ने
निस्तब्ध रातको मौन सपनाबाट
बिहानी शान्ति ब्यूँझाएर
सङ्केत गर्थे ती- दिनको यात्रालाई
एकदिन नयाँ भूगोल खोज्यो सपनाले
हिँड्न नसकिने बाटोबाट
तय भयो जिन्दगीको यात्रा
सहर
सभ्यता
सपना
सबै सबै मोलेर खिस्याइरहे- पाइलाका गतिलाई
र
खसिरहे सपनाहरू- आँखाका डिलबाट।
