मादलको तालमा / गीता त्रिपाठी

तिम्रा औंलाहरू पक्रेर
यी मादलहरू
खै कसरी बज्ने हुन् नयाँ धुनमा ?

ताल, तिमीले बिर्स्यौ कि मादलले ?
बासना, तिमीले हरायौ कि फूलले ?
टोपी तिमीले फुकाल्यौ ?
वा फुकाल्यो, तिम्रो सभ्यताले ?

ऊ त्यो तस्वीरको
सानो भाइलाई सोधिहेर-

उसको मौलिक उचाइ
के यति नै बाँकी छ अब ?

सोधिहेर, एकचोटि उसलाई !

उसका गीतहरू
कुन सुर पक्रिरहेछन्,
हिजोआज ?

किन गर्जिरहेछन् ती
चैतको मेघ जसरी,
खबरबिनाको हुलाकी भएर ?