तराईको जग हाम्रो ह्यूँचुलीको छानो
देश होस् त यस्तै महान् नभैदिओस् सानो ।
साझा हाम्रो चौतारी छ संसारमा नामी
नाउँ यसको नेपाल हो, नेपाली हौँ हामी
भिन्नाभिन्नै संस्कृतिका भिन्नाभिन्नै जाति
किन्तु यौटै द्यौरालीमा चढाउँछौ पाती ।
नदी-नाला पर्वत छन् जङ्गल र ताल
पुर्खौँदेखि गर्दै आयौँ यै देशको ख्याल
उब्जाउ छ धर्ती हाम्रो उर्वरा छ माटो
भाग्य दिने पाखुरी छन् पौरखको बाटो ।
आज पनि उस्तै हाम्रो उन्नत छ बानी
उस्तै हामी पौरखी छौँ उस्तै स्वाभिमानी
सागरलाई पानी दिन्छौ सगरलाई छानो
सम्झिदिए पनि हुन्छ ह्यूँचुलीको छानो ।