भारत की संस्कृति के लिए... भाषा की उन्नति के लिए... साहित्य के प्रसार के लिए

हमहूँ दीवाली मनईतीं / हरींद्र हिमकर

Kavita Kosh से
Jalaj Mishra (चर्चा | योगदान) द्वारा परिवर्तित 12:17, 8 जून 2020 का अवतरण ('{{KKGlobal}} {{KKRachna |रचनाकार= |अनुवादक= |संग्रह= }} {{KKCatKavita}} {{KKCatBhojpuriRachna}...' के साथ नया पृष्ठ बनाया)

(अंतर) ← पुराना अवतरण | वर्तमान अवतरण (अंतर) | नया अवतरण → (अंतर)
यहाँ जाएँ: भ्रमण, खोज

मईया लछिमी तू मड़ई में अईतू
दुअरिआ पर दियरी सजईतीं

मड़ई में अईतू त चटई बिछइतीं
गाई का गोबरा से अँगना लिपईतीं

मूज का रसरिआ में आम का पतईयन से
झलर-मलर झलर-मलर झलरी लगईतीं

मईया लछिमी जो अँखिया घुमईतू
त राह में अँजोरिया बिछईतीं

हरदी चउरवा से चउका बनवतीं
दूब-धान पंखुरी से चउका सजऊतीं

केरा का पतईन पर मरचा के चिउरा
आ दही गूड़ परसी के जेवना जेंवंईतीं

मईया एक बेर जूठन गिरईतू
त असरा के कलसा सजईतीं

एक बेर अईतू त लइतीं बतासा
बजवईतीं दुअरा पर पिपुही आ तासा

मन फेरवट तोहरो नू होईत हे माई
रहिया बदलतू त बदलित परिभासा

माई एक बेर खप्पर घुमईतू
त हमहूँ पटाखा उड़ईतीं

मड़ई में अईतू त चौमुख सजवतीं
तोहरा के खिल आ बतासा चढ़उतीं

चन्नन से चउका पुरईतीं हे माई
हमहूं अँगनवा मे हवन करवतीं

मईया एकबेर अँखिया घुमईतू
तू बिगड़ी बनईतू
त हमहूं दिवाली मनईतीं
दूअरिया पर दीयरी सजईतीं