भारत की संस्कृति के लिए... भाषा की उन्नति के लिए... साहित्य के प्रसार के लिए
सीतोॅ में उजास हे / अनिल कुमार झा
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 19:33, 22 जनवरी 2021 का अवतरण ('{{KKGlobal}} {{KKRachna |रचनाकार=अनिल कुमार झा |अनुवादक= |संग्रह=ऋत...' के साथ नया पृष्ठ बनाया)
बैंगनी सीमोॅ के फूल खिलै छै नीला रं अकास हे,
लाल किरणियाँ आबी भरलकै सीतोॅ में उजास हे।
दिन ते डेग-डेग धरै में सिहरै
खाली तरवा सीतोॅ से भिंजलै,
कोकड़ी के सिसकारी लै लै
केन्होॅ बुतरू सुरूज से मिललै।
चली चली के थकलोॅ गेलै मिललै न कन्हौं विभास हे,
लाल किरणियाँ आवी भरलकै सीतों में उजास हे।
दुआरी पर घूरी के घेरी के बैठलोॅ
आपस में गप्पोॅ पर गप्प निकललोॅ,
बच्चा तेॅ लुत्ती जराय के फूकै
दिन दुनियाँ छै हालत छितरलोॅ।
चुनी निछी बातोॅ के बात की कहियोॅ जीवन बितै बिन आस हे
लाल किरणियाँ आबी भरलकै सीतोॅ में उजास हे।
कालोॅ के चिंता पर कल के चाहत
खेती किसानी पर घिरलोॅ आफत,
मौसम न मौसम के रखवाला सब
सोचै न कुछू छै साँसोॅ के साँसत।
गुजर-बसर जे होय जा कैन्होॅ रहै न कोय कहूँ पास हे,
लाल किरणियाँ आबी भरलकै सीतोॅ में उजास हे।
