भारत की संस्कृति के लिए... भाषा की उन्नति के लिए... साहित्य के प्रसार के लिए
झमझम करनें वरषा ऐलेॅ / कुमार संभव
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 00:12, 26 मार्च 2021 का अवतरण ('{{KKGlobal}} {{KKRachna |रचनाकार=कुमार संभव |अनुवादक= |संग्रह=ऋतुव...' के साथ नया पृष्ठ बनाया)
धन्य प्रेम पावस के रसभरलोॅ
घास-दुभड़ी तक छेलै जे जरलोॅ,
कंठ कृषक के जे छेलै सुखलोॅ
सबके रोम-रोम हरियैलेॅ,
झमझम करनें वरषा एैलेॅ।
पायल प्रेम सबद रस घोलै
दादुर हकरै, रहसै जी खोलै,
झिंगुर शोर मचाबै, झुनझुन बोलै
चमचम बिजली चमकी गेलै,
झमझम करनें वरषा एैलेॅ।
उमड़ी घुमड़ी घेरि घहरै मेघ
बून गिरै ते लागै गिरै नेग,
सच्चे टूटलै आय ग्रीष्म के टेग
कृषक किशोरी के जी हरसैलै,
झमझम करनें बरषा एैलेॅ।
झमकी-झमकी झोॅर परै छै
रिमझिम-रिमझिम बून्द गिरै छै,
झरझर गाछी सें बून्द झरै छै
धरती के कण-कण पनियैलेॅ,
झमझम करनें वरषा एैलेॅ।
