भारत की संस्कृति के लिए... भाषा की उन्नति के लिए... साहित्य के प्रसार के लिए
मातलो छै रात / त्रिलोकीनाथ दिवाकर
Kavita Kosh से
सशुल्क योगदानकर्ता ५ (चर्चा | योगदान) द्वारा परिवर्तित 23:55, 17 नवम्बर 2021 का अवतरण ('{{KKGlobal}} {{KKRachna |रचनाकार=त्रिलोकीनाथ दिवाकर |अनुवादक= |संग...' के साथ नया पृष्ठ बनाया)
सूना-सूना लागै रामा, चैतो के मास हो
तोरा बिना हम्में पिया रहै छी उदास हो।
बीती गेलै फागुन मास, गेलै नै खुमार हो
उख-बिख मोन लागै, देहो में झुमार हो
सपना में देखी तोरा जागलाँ हटास हो..
तोरा बिना हम्में पिया रहै छी उदास हो।
सिमरो के लाल फूल, सुगबा के भावै हो
बेली के सुगन्ध झरैैै, भौरा उमताबै हो
खदर-बदर पिपरी-खोटा, घुमै आस-पास हो
तोरा बिना हम्में पिया रहै छी उदास हो।
ठाले-ठाले रस भरलो, महुआ रो गाछ हो
मदरैलो गमकों सें, मातलो छै रात हो
ठंढ़ा-ठंढ़ा पछिया में, लागै तरास हो
तोरा बिना हम्में पिया रहै छी उदास हो
सजलॉ न धजलॉ हम्में, गेल्हो परदेश हो
रात-दिन लोर चुवै कजरा छै शेष हो
कहिया तों ऐभो पिया, लगैैनै छी आस हो
तोरा बिना हम्में पिया रहै छी उदास हो।
